Aféierung vum Dechen Jean-Jacques Flammang

E Sonndeg, den 19. November huet eise Bëschof, de Kardinol Jean-Claude Hollerich an der Persoun vum P. Jean-Jacques Flammang SCJ en neien Dechen fir den Dekanat Zentrum agesat.

Dem Pater Flammang sinn den Dechen adjoint Romain Richer an d’Assistentin Regina Hüneke zur Säit gestallt. Den Dechen ass de Vertrieder vum Bëschof am Dekanat an och deen, deen dem Bëschof d’Uleies vun der Par virleet.

Doniewent encouragéiert hien den Zesummenhalt an d’Zesummenaarbecht vun de Paschtéier an alle pastorale Mataarbechterinnen a Mataarbechter, huet d’Presidentin vum Pastoralrot vun der Par Atertdall Sainte-Claire, d’Betty Heimermann an hirer Begréissung gesot.

Mat dem Generalvikar Patrick Muller a Pateren vu Clairefontaine, hu vill Paschtéier, Mataarbechterinnen a Mataarbechter, Vertrieder aus de Pastoralréit aus de Paren vum Dekanat Zentrum a Vertrieder vun de verschiddene Gemengen um feierleche Gottesdéngscht deelgeholl. Eng gutt besate Chorale mat Sängerinnen a Sänger aus de Choralle vun de Pare Rammerech Saint-Valentin & Atertdall Sainte-Claire hunn ënnert der Direktioun vum Fernand Scheller a begleet vum Organist Carlo Philippe dës Mass verschéinert.

Am Uschloss huet d’Gemeng Réiden an den CGP vun der Par Atertdall Sainte-Claire op eng Receptioun invitéiert.

Fotoen: SCP/G. Kieffer a Charel Reiser